甩皮甩髻的信徒

感謝神俾機會我喺度同大家分享得救見證。我自少喺一個公屋家庭長大，感恩喺基督教中學認識耶穌，並喺中三春令會決志信主，數數手指已經有三十二年嘞。我由細到大，不論喺學業同工作上一直都好平順，亦過著市井信徒嘅生活，心裏認知三一神嘅存在，但本身應該係缺少咗敬畏神嘅心，得到救恩後卻過著唔相稱嘅生活，保持著賭博嘅壞習慣同埋屬世嘅投機心態。

喺我拍拖嘅時候我經歷人生中第一個神跡，就係我同太太傳福音時，佢竟然一聽就信咗耶穌，呢個真係千金難買嘅恩典。

結婚後我倆育有一子一女，兩個都好乖巧，我倆嘅工作都好平順，生活上可算係冇太大困難。係近呢兩年我工作上持續有啲唔愉快嘅經歷，感恩有太太時刻聽我傾訴，同埋提醒我多禱告交托。

我倆自從2012年已經恆常出席團契同埋祟拜，並早於2014年己完成水禮前嘅三個課程。太太講佢已經準備好接受水禮，反而我因為仲被賭馬等壞習慣所纏繞，怕會做了壞見證，所以不敢接受水禮。太太亦尊重我嘅意願，咁樣嘅膠著狀態一直維持。

直到今年七月尾，我太太確診第四期肺癌。想到同甘共苦20年嘅太太要受咁嘅苦難，我潛意識接受唔到咁嘅事實，不論喺日常生活時、看到太太時、又或是夜半禱告時，都經常不自禁地流淚，甚或爆喊，心裏很自然問點解會咁樣，當中有幾次腦海中有聲音回應。有一次係聽到：「義人受苦也有例子，就算約伯也受到極大嘅苦難」，另有一次是說：「為要顯示神的大能」。呢個正正係門徒問到耶穌一個生來瞎眼嘅人，是否因為佢或者佢嘅父母犯罪時，耶穌在約翰福音9:3中嘅回答，「也不是這人犯了罪，也不是他父母犯了罪，是要在他身上顯出神的作為來」。當想到至愛受難時，很想只由自己承擔，也有聲音説：「每人有每人在世嘅功課」。呢啲都係呢兩年工作唔開心時聽道嘅內容，原來神喺呢兩年一直準備好安慰我。小信嘅我期間都有一些悲觀思緒，當我想到太太可能要離開世界時我會跟她一起走嘅時候，有一把聲音說：「我有叫佢離開咩，你使乜咁樣諗呢？」心裏也覺得有啲吊詭，但我深信呢啲都係聖靈比我嘅安慰同埋提醒。喺我人生中呢段最黑暗嘅日子，我想到主嘅慈繩愛索將無力嘅我拉到佢嘅跟前，為要顯明主奇妙作為同埋大能。太太患癌這件事將舊我重重擊碎。之前我有祈求除掉自己嘅壞習慣，神真係聽我禱告，我現在真係戒除咗，因為唔想浪費一分一秒去做冇意義嘅事。我心裏隨之浮現嘅，就是要做一個似樣嘅基督徒，而唔係一個甩皮甩髻嘅信徒。要珍惜眼前嘅人

同埋每分每秒，為主做好見證，亦準備好接受水禮。

我同太太喺呢四個多月嚟，每日都領受好多恩典，亦遇到很多天使。太太宜家接受鏢靶藥嘅治療，進展良好，喺10月時腦部嘅腫瘤已經消散，最近掃描顯示肺部同淋巴嘅腫瘤都已經縮細左。喺呢段等候嘅日子中，太太每日靈修禱告，雖然間唔中因為藥物副作用以致情緒低落，但係有好大部份時間都十分喜樂平安，仲可以日日如常生活買餸返工，冇請過一日病假，真係一個神跡。我都比四個月前心裏平安，都希望為主做好見證。我希望我同太太能夠喺日後分享康復見證時續一數算神的恩典，也可以喺神嘅事工上有份。喺呢度要感謝牧愛伉儷團契真的愛你小組前任和現任四個組長同埋其他組員嘅同行，仲有牧伉弟兄姊妹嘅代禱。願榮耀歸與我哋三一真神，願主祝福大家。