尋找必尋見

      首先想同大家分享少少關於我成長嘅背景。其實我好細個嘅時候,爸爸媽媽就分開咗，將我交往阿爺阿嫲照顧。雖然係咁，阿爺阿嫲照顧得我好好，甚至乎太縱我。亦都因為咁，我嘅性格慢慢變得叛逆，好似自己想點就點咁，成日發脾氣，又成日唔返屋企，喺街度同班朋友流連。即使成日出去玩，我仍然會感到空虛同寂寞，覺得好孤獨。尤其是2015年阿嫲過身之後，我就更加覺得呢個世界好似無人愛我，一切都冇晒意義。

       但正正係喺我人生最低潮嘅呢個時候，天父向喺幽谷中沉淪嘅我伸出援手。仲記得喺2018年嘅一日，我表妹喺學校帶咗個耶穌嘅公仔返黎話送比我，仲話:「耶穌好勁㗎!」咁我就問我表妹: 「有咩咁勁呀? 」佢就竟然答我話: 「你睇!呢個耶穌公仔有六舊腹肌! 係咪好勁呢! 」之後我就Keep住呢個耶穌嘅公仔。

       後來有一日，我好唔開心，唔知點解就醒起表妹送畀我嘅耶穌公仔，腦海中就出現咗耶穌，我開始向神禱告。喺禱告嘅過程入面，雖然我合上眼睛，但我看到一道光，我感覺自己好似俾人攬住咁，感覺好溫暖，成個人慢慢平靜落黎，感覺好有安全感。

       之後我開始keep住禱告，有一種解釋唔到嘅力量驅使我有好大嘅欲望，想去親近神、認識神，所以我曾經走入不同嘅教堂，獨自向神禱告。之後我開始搵教會去了解更多。我又再次向天父禱告，希望全能既主能夠帶領我去到一間適合我嘅教會。藉著神嘅恩典，有一日同朋友講起我想搵教會，佢就介紹左我來到 恩福 呢一個大家庭。

       就係咁，我認識神多咗，感受到神嘅愛係信實而又無微不至嘅。神知道我嘅需要，我開始學會交托，將我嘅開心同唔開心同神去分享，慢慢我發覺我膊頭輕鬆咗好多!

       而係神嘅教導同引領下，我開始去除以前嘅一啲壞習慣，例如開始戒煙戒酒，唔再貪玩，價值觀亦都改變咗好多， 例如懂得感恩，學曉寬恕別人。喺呢一年入面，我跟隨天父嘅旨意，完成佢交俾我嘅功課，例如我完成咗「成長八課」和「主日學」，使我更親近主和進一步認識神。最近，我參與泰北短宣，向一啲山區嘅兒童傳福音，教導佢哋唔同嘅知識。去泰北之前，我有啲擔憂自己是否能夠勝任這個使命，但天父早已為我哋安排好一切，令我哋嘅旅程非常之平安同充實。而我亦都好感恩，藉著神嘅恩典，我今日可以係度同大家分享我嘅見證，亦可以喺今日受洗，正式成為一位基督徒。感謝主將我嘅不可能變成可能!

      願主祝福你們! 多謝!