平靜與安穩

      我係一名獨生女，喺基督教家庭長大。因為爸爸媽媽要返工嘅關係，由細到大我都係由婆婆湊大，同舅父、舅母一齊住。

      舅父係做生意，婆婆係好傳統嘅潮州人，好重男輕女，令我細細個就知道做人係好唔公平。而喺我成長裡面，我覺得錢係一樣好重要嘅嘢，係用嚟衡量一個人嘅價值。因為比較有錢嘅屋企人就有發言權，受人尊敬，其他人會去討好佢哋。亦由於錢嘅關係衍生嘅問題都好多，例如好多嘅婚外情、呃屋企人錢，俾大耳窿追債咁‧‧‧‧‧‧喺電視見到嘅劇情，喺我屋企都係見怪不怪。 所以由細到大，我嘅價值觀都被扭曲同好冇安全感。但呢D嘢我都唔敢俾人知道，因為喺人哋心目中，我係一個好幸福、無憂無慮嘅開心果，成日都係笑咪咪咁。所以我從來都唔會同人講自己嘅嘢，亦好少分享自己嘅感受。

      我之前有一個拍咗拖 10年嘅男朋友，佢係一個好好嘅男仔，但因為我缺乏安全感，喺呢10年裡面，我就一直做好多令佢受傷害嘅事，我想試吓佢究竟有幾愛我，我想揾一個不求回報，對我無限付出嘅人，追求我所認為嘅安全感。但當我以為佢就係呢個世上最愛我嘅人嘅時候，佢突然向我提出分手‧‧‧‧‧‧然後，伴我成長嘅三舅父因急病而去世，與此同時，工作上又遇上前所未有嘅壓力，我嗰時覺得人生係完全無出路，情緒出現咗好大嘅問題，我要每晚食安眠藥先可以瞓到覺，呢個狀態都維持咗一、兩年。

      喺呢段日子，好感謝主耶穌再一次喺我生命裡出現。我舅父臨終前同我講最想我返返教會，而佢臨終前信靠神嘅見証並佢信主後嘅改變，令我覺得神真係有能力去改變一個人，係一個能拯救人嘅神。喺公司裡，神又讓我遇到一個好好嘅基督徒同事，佢見到我有情緒嘅問題，會主動陪我傾計、禱告，又邀請我去佈道會，嗰次佈道會後，我就決定要再一次返到教會????面。

      有一次聽到耶穌平定風浪嘅經文，有一句說話好入心：祂對門徒說：「你們為什麼這樣害怕呢？你們還是沒有信心嗎？」，其實耶穌已經同門徒生活咗一段日子，門徒亦剛見證完耶穌所行嘅神跡，但在遇上大風浪時就好驚，甚至埋怨耶穌唔理佢哋，就係呢句說話令我諗起神一直喺我身上所做嘅每一件事，神一直都同我一齊，令我想到神真係好愛我，我對神嘅信心也愈黎愈大。

      信主前，我係一個好現實，好要面嘅人，我淨係睇自己或者別人嘅成就去衡量一個人嘅價值。我會覺得揾錢多、做份人人羨慕嘅工，就係人生要追求嘅嘢。

      但信主之後，我嘅價值觀改變咗。我唔再認為錢就係人嘅一切，生命價值係源於—祂是愛我，為我捨命。

      仲有喺我信主之前，我係一個好無安全感嘅人，所以對自己擁有嘅嘢或者想要得到嘅嘢，會有一種瘋狂嘅慾望，就好似我對之前嘅男朋友咁。最後當然係弄巧反拙，得到嘅永遠唔係我想要嘅預設答案，咁我就更加發癲，情緒更加失控。

      但信主之後，我知道除咗神之外，冇嘢係可以永遠擁有同永恆不變，安全感係嚟自神，唔係嚟自會改變、朽壞嘅嘢。我慢慢明白好多嘢唔係自己想點就點，同埋唔係一定控制喺自己嘅預設範圍之內。

      工作方面，我又成日覺得自己好醒，做嘢叻過其他人。但一做錯嘢或者表現有少少唔好嘅時候，就成日揾好多藉口或者講大話去掩飾自己嘅過錯。其實心裡面就係好驚人哋睇低自己，驚自己冇存在價值，好在乎人哋對自己嘅評語。

      而家我發覺自己心態唔同咗。就好似我想轉工，以前如果見完工冇消息，我會係咁諗點解仲未打嚟、又或者揾唔同嘅渠道打探吓原因，好想知點解。而家就算連interview 嘅機會都冇，我都只係會祈禱話俾神聽，之後就會放埋一邊。因為我會覺得神會帶領我要行嘅路，就好似我冇諗過之前失戀、家人離世、工作壓力咁多不幸嘅事，最後竟然係令我返到神裡面。正如《傳道書3:11》所說:「神造萬物，各按其時成為美好，又將永生安置在世人心裡。然而神從始至終的作為，人不能參透。」

多謝大家，將榮耀歸俾神。