甩皮甩髻的信徒

感谢神俾机会我喺度同大家分享得救见证。我自少喺一个公屋家庭长大，感恩喺基督教中学认识耶稣，并喺中三春令会决志信主，数数手指已经有三十二年嘞。我由细到大，不论喺学业同工作上一直都好平顺，亦过着市井信徒嘅生活，心裏认知三一神嘅存在，但本身应该係缺少咗敬畏神嘅心，得到救恩后却过着唔相称嘅生活，保持着赌博嘅坏习惯同埋属世嘅投机心态。

喺我拍拖嘅时候我经歷人生中第一个神迹，就係我同太太传福音时，佢竟然一听就信咗耶稣，呢个真係千金难买嘅恩典。

结婚后我俩育有一子一女，两个都好乖巧，我俩嘅工作都好平顺，生活上可算係没太大困难。係近呢两年我工作上持续有啲唔愉快嘅经歷，感恩有太太时刻听我倾诉，同埋提醒我多祷告交托。

我俩自从2012年已经恆常出席团契同埋祟拜，并早于2014年己完成水礼前嘅三个课程。太太讲佢已经准备好接受水礼，反而我因为仲被赌马等坏习惯所缠绕，怕会做了坏见证，所以不敢接受水礼。太太亦尊重我嘅意愿，咁样嘅胶着状态一直维持。

直到今年七月尾，我太太确诊第四期肺癌。想到同甘共苦20年嘅太太要受咁嘅苦难，我潜意识接受唔到咁嘅事实，不论喺日常生活时、看到太太时、又或是夜半祷告时，都经常不自禁地流泪，甚或爆喊，心裏很自然问点解会咁样，当中有几次脑海中有声音回应。有一次係听到：「义人受苦也有例子，就算约伯也受到极大嘅苦难」，另有一次是说：「为要显示神的大能」。呢个正正係门徒问到耶稣一个生来瞎眼嘅人，是否因为佢或者佢嘅父母犯罪时，耶稣在约翰福音9:3中嘅回答，「也不是这人犯了罪，也不是他父母犯了罪，是要在他身上显出神的作为来」。当想到至爱受难时，很想只由自己承担，也有声音説：「每人有每人在世嘅功课」。呢啲都係呢两年工作唔开心时听道嘅内容，原来神喺呢两年一直准备好安慰我。小信嘅我期间都有一些悲观思绪，当我想到太太可能要离开世界时我会跟她一起走嘅时候，有一把声音说：「我有叫佢离开咩，你使乜咁样谂呢？」心裏也觉得有啲吊诡，但我深信呢啲都係圣灵比我嘅安慰同埋提醒。喺我人生中呢段最黑暗嘅日子，我想到主嘅慈绳爱索将无力嘅我拉到佢嘅跟前，为要显明主奇妙作为同埋大能。太太患癌这件事将旧我重重击碎。之前我有祈求除掉自己嘅坏习惯，神真係听我祷告，我现在真係戒除咗，因为唔想浪费一分一秒去做没意义嘅事。我心裏随之浮现嘅，就是要做一个似样嘅基督徒，而唔係一个甩皮甩髻嘅信徒。要珍惜眼前嘅人

同埋每分每秒，为主做好见证，亦准备好接受水礼。

我同太太喺呢四个多月嚟，每日都领受好多恩典，亦遇到很多天使。太太宜家接受镖靶药嘅治疗，进展良好，喺10月时脑部嘅肿瘤已经消散，最近扫描显示肺部同淋巴嘅肿瘤都已经缩细左。喺呢段等候嘅日子中，太太每日灵修祷告，虽然间唔中因为药物副作用以致情绪低落，但係有好大部份时间都十分喜乐平安，仲可以日日如常生活买餸返工，没请过一日病假，真係一个神迹。我都比四个月前心裏平安，都希望为主做好见证。我希望我同太太能够喺日后分享康復见证时续一数算神的恩典，也可以喺神嘅事工上有份。喺呢度要感谢牧爱伉俪团契真的爱你小组前任和现任四个组长同埋其他组员嘅同行，仲有牧伉弟兄姊妹嘅代祷。愿荣耀归与我哋三一真神，愿主祝福大家。