信仰一家人

證道搜尋




走過「情緒」的低谷

仔仔有情緒病,工作壓力大之下辭了份工,最心愛既揚琴都唔彈,好唔開心,亦抗拒睇精神科,我們也不敢再提。全家人愁眉深鎖,沒溝通,鬧交多過食飯,夫妻亦互相埋怨。

信了主兩年,仔仔未見有好轉,情緒反反覆覆。曾經在街上、飯店內鬧情緒。我們夫妻返伉儷團契後,價值觀改變了,學習耶穌既教導,彼此相愛;懂得包容,溝通亦多了,憑著神給我們既應許,學習等待。

有天,我們一家如常到恩福堂午堂崇拜後,就開車到太平山頂行山。等了半小時都無泊車位,就轉去山頂警察博物館。泊好車,就在一條通往香港仔水塘既路行了個半鐘;之後本想去香港仔食飯,怎知行錯路,就轉去西環食煲仔飯;我在門外等車位,太太及仔仔就先行入坐;就在同一時間,一輛警車隨後到。

太太和仔仔坐的那張枱,因為對著風扇,覺得凍,就改坐另一張枱,但原來該枱已有人留坐,唯有轉返去之前張枱,仔仔好不耐煩。就在這個時候,兩名警員亦進入飯店,仔仔看見,就喊叫第一位警員的編號,警員點點頭;接著又叫第二位警員的編號,對方亦很有禮貌地回應「Hi你好!」就繼續行入飯店。這時,太太發覺仔仔情緒開始唔穩定,怕他大吵大鬧,影響飯店做生意,就叫仔仔離開,仔仔情緒更激動。

我見仔仔情緒激動,就即時下車,勸慰他。但仔仔繼續走近警車拍打車門,混亂中我和太太跌倒,車內警員落車,問仔仔做咩嘢,接著便透過對講機叫飯店兩個警員出來;街上又來了四個警員,加埋六個警員將我仔仔按在馬路上。街上很多人圍觀,我和太太都十分驚慌,怕警察告他襲警要坐監。那時,我對警長說仔仔情緒病有睇醫生,警長說自己也為人父母,明白我們既心情。於是,警長就叫警員call白車,之後就走近仔仔身邊講:「我地做個朋友握下手。」這個時候,仔仔就話:「對唔住警長,對唔住爸爸媽媽!」

到達瑪麗醫院,經醫生診治後需要留醫,仔仔好驚,上到病房,睇見病房寫著「精神科」,情緒更混亂,極力掙扎想走,有七個醫護人員捉實仔仔,將他綁在床上,打了一支針,仔仔便瞓了。這個情境令我們心如刀割,便喊起來,護士說明天探病時間才可以探病。。

回家路上仍十分難過⋯⋯近半年仔仔有幾次情緒不穩,日子實在好難過;因此曾經想過不如一家撞車死去⋯⋯非常擔心仔仔個病比之前更嚴重,不知如何是好。當晚我們一齊祈禱,求問「父呀!祢愛我嗎?」⋯思前想後,聖靈提醒,我們要見證主耶穌的大愛,將榮耀歸俾天上的父,剛強起來才得到平安和盼望。

第二天早上,我們急不及待去醫院,在病房門口已看見仔仔自由走動;問護士,「唔係要綁著咩?」護士就話:「你地走咗個半鐘,就放咗佢啦!」呢兩年仔仔無關心過我們倆老,但今日見到我們,居然立即叫爸爸媽咪,又禮貌地叫人拿椅子給我們坐。因為是男病房,無女廁,仔仔又關心媽咪可以去哪處的洗手間⋯⋯我們迷失了既兒子終於回來,清醒咗啦!我一家好似無出路既時候,感謝主,主呀!袮的奇妙作為,原來警察、醫生、護士是主派來既天使;當日我們兜兜轉轉來到西環,原來都是神的安排。

感謝主!仔仔出院了,亦在康復中,一家人重拾溝通,生活如常。有練琴、返團契、參與教會事奉。仔仔更話要去搵工,賺些生活費。感謝主的憐憫,賜予咁好既恩福堂;牧者、傳道人、組長及弟兄姊妹,禱告中時常記念我們一家,給予支持及鼓勵!今日仔仔生活如常,完全是神既恩典。感謝主鴻恩,拯救我們一家。

天離地何等的高,主的慈愛也是何等的大!
詩篇86 :10 「因祢為大,且行奇妙的事,惟獨祢是神。」 將一切榮耀頌讚歸給慈愛天父!


撰文/志深、美蘭
(更多「健關部」分享文章:https://bit.ly/2WlGmDs